• 【作品疑影射反修例】陸網民投訴後DC跪低刪post
    Youtube下架《我的英雄學院》片尾曲
  • 2019-11-29    

 

《航海の唄》完整版MV截圖
畫面令人聯想到「反修例」
這一幕似民間記者會?

近年英雄題材動漫大行其道,不過美國DC漫畫公司的最新漫畫封面,竟然發布無耐就下架;日本動畫《我的英雄學院》第4季片尾曲《航海の唄(航海之歌)》完整版MV,喺Youtube上架後又被收起,只剩低較短版本。點解咁奇怪嘅?各國網民猜測,皆因中國人又玻璃心發作,然後逼外國公司跪低。

是咁的,DC漫畫《蝙蝠俠:黑暗騎士歸來》將出版續作,並喺IG出post宣傳。宣傳圖中明顯可見蝙蝠女準備拋擲燃點嘅汽油彈,更寫住:「未來是年輕人的。」網上亦又另一圖流出,喺手持汽油彈嘅蝙蝠女身後,仲有一班戴頭盔、面罩兼拎棍棒嘅抗爭者。中國網民見到之後,立即解讀為「支持港獨」,大批簡體字大軍湧到DC官方IG留言:「DC在暗示什麼鬼?蝙蝠俠拿燃燒瓶第一次見。」「任何人都不要妄想分裂中國。」無耐之後上述DC post被刪去,但又惹嚟中國以外嘅他國網民洗版,批評DC向中國跪低。

無獨有偶,日本大熱動畫《我的英雄學院》第4季剛開播,片尾曲是Sayuri(缺氧少女)主唱的《航海の唄》。Sayuri喺官方Youtube上載完整版MV,但後來被Youtube下架。網民普遍認為又係玻璃心中國人投訴所致,事關《航海の唄》MV有不少令人聯想到香港「反修例」運動的元素:戴防毒面具的學生喺血紅嘅環境中感到痛苦並逃跑,逃到學校堆起枱櫈並被媒體報導,其他學生見到之後紛紛戴上防毒面具響應加入,再舉行類似民間記者會,最後學生們喺黃色世界中拋起面罩似係慶祝勝利。Youtube剩低嘅短版MV,恰恰就缺少上述疑似「反修例」運動嘅元素。

唔少外國網民立即劍指中國,認為佢哋太敏感太小氣,因為普遍都知道「防毒面具是主唱Sayuri常用元素,學生更加係呼應作品《我的英雄學院》」,唔一定同「香港」有關。何況,中國人咁樣做只會適得其反,惹嚟更大反彈,例如就有外國網民話:「我們需要反抗,這裡不是中國。」「一個被下架,就會有三個重新上架,永遠不要嘗試在網絡世界封鎖某些事物。」的確,為數不少的完整版《航海の唄》MV被不同人上載到Youtube,要全數再下架不是易事。

看來,中國網民令人反感的行為,令各國網民都聯繫起來了。

-----------------------------

【壹週刊直播平台 ChannelNEXT】

立即睇

全城抗暴 區區論壇同你深度剖析

-----------------------------

【升級壹會員登記站 為你解疑難!】

親臨旺角、銅鑼灣做升級壹會員,即送「香港人:抗爭之夏」限量明信片

詳情地址