• 【Freeze成員變首飾設計師】陳樂榣打拚四年 創業作現光環
  • 2019-11-28    

 

眼前這位貴氣的首飾店老闆,是昔日女子組合Freeze的成員陳樂榣。這個女子組合自10年組合解散後,有美術根底的她,開班教畫,當美術老師,其餘兩位成員,甄詠珊做大台藝員,拍緊《愛.回家》,石詠莉則去年下嫁鄧健泓,成為人妻,專攻「發燒碟」市場的歌手。

退出娛圈的陳樂榣,四年前與好姊妹,即《解決師》裡飾演「情婦Tracy」的楊柳青,以玩票性質在網上賣韓國首飾。從商事業發展至今,陳樂榣有自家設計品牌WOW JEWELLERY,還在韓國設工場,由設計鑲崁出品一條龍,走中檔路線的飾品,吸引一批忠粉,從商路令她的事業現光環。

由藝人轉營成生意人,她說最大挑戰是由依賴變自律。「以前做歌手,日日有人幫你排好工作,叫你學乜就學乜,做咩就做咩,唔使點諗,

每樣都有人安排晒,回想以前覺得幾幸福。依家做生意,每日醒來或睡前就要諗,聽日有咩要做,安排好個時間表,排錯的話又會責怪自己。因為以前排錯係助手或經理人問題嘛!

從商後,每日提醒自己有點樣進步,保持喺呢行嘅競爭,經營一盤生意,心態好重要。」陳樂榣。

當日她以一萬元,展開創業路。

「當年攞住一萬蚊,同楊柳青過去韓國入貨,諗住入下貨仔玩下食下,買下衫然後post上網,好簡單嘅網上生意,睇下有冇人鍾意,我哋入貨有又唔係入好多,五條至十條,諗住賺到就當bonus,

當初做生意零經驗,只識揀晒自己最鍾意嘅款式,冇諗過市場,只覺得冇損失,冇人買我鍾意嘅貨,我咪自己戴番晒。」

好彩食正韓風,創業作扑中,開網店主打少女客路,賺到五位數字的第一桶金。

「創業開始除咗食正韓風,亦加上入咗啲開始興嘅,好幼細嘅字母,手鍊,都係我鍾意嘅嘢,點知扑中咗,未落機返港,已經收好多order,入晒錢,好受歡迎。」她說。

之後楊柳青專心拍劇,繼續賣首飾嘅Alley,明白創業容易守業難,更從客人投訴中學習。

「每日花時間覆客,個人變得好緊張,面對客人不同類型嘅訊問或投訴,好在我教過畫,攞番教小朋友一套,去同佢哋傾,要有耐性,先應付到。

「其實啲投訴只係一刻,你解釋晒,佢cool down咗,轉頭睇番留言,佢地就話多謝你解答俾我聽。」應付客人,絕對是一門學問。

為鑑控品質,她甘於頻食檸檬,多次拜會一位韓國資深金工師傅,最終以誠意打動對方,一齊合作,由設計、選料、鑲崁,出品一條龍,有質素嘅自家品牌,結果令她殺出一條血路,由妹妹仔貨款,轉行中檔路線,貨品價錢由幾百至幾千不等,客源固定,生意上軌道。訪問當日,見到幾啤年輕情侶及準新人,前來揀結婚飾物。

面對香港不穩局勢,逆流而上,生意多少受影響。

「依家時勢係一個考驗,但我調節到。其實之前我哋(從商者)太過安於現狀,依家係要再多啲動腦筋而已。」

退出娛圈多年,仍然有客人認出她,對她的評價,比當藝人時更好。

「有時喺網上睇下啲留言,佢地會話:『唔知你係咪退出咗呢行,個樣順眼咗,個人成熟咗,感覺又會好啲。』。」昔日的Freeze,予人性感三女,被動的包裝,埋沒個人風格。今天的陳樂榣,成了主腦,一舉手一投足帶點優雅,這盤事業之所以現光采,相信尋回自己,也是主因。

-----------------------------

【壹週刊直播平台 ChannelNEXT】

立即睇

全城抗暴 區區論壇同你深度剖析

-----------------------------

【升級壹會員登記站 為你解疑難!】

親臨旺角、銅鑼灣做升級壹會員,即送「香港人:抗爭之夏」限量明信片

詳情地址