• 【胞妹自殺 父母相繼離世】顧美華夜闌人靜自責:我當日做得唔足夠
  • 2019-12-01    

 

現年66歲的顧美華,35年前拍第一部電影《似水流年》,即奪「最佳新人獎」,一鳴驚人。有說當年離婚,她為要替兩個女兒交學費,才決定入行。相隔多年,她澄清:「坦白講,從來拍戲都唔係為咗錢,因為新人片酬可以有幾多?而花時間就好長,好多時都係半推半就,唔知點解嘅情況下進入電影圈。之後拍好多港台劇,港台人工有幾多,大家都清楚。」她表示當日離婚未幾,不想在家胡思亂想,所以找些寄託-「當時都不過係三十歲出頭,搵一份工作好應該。」

電影贏盡口碑,不過,她至今才拍了二十多部電影,平均一年未有一部,她說從來沒想過要再有突出成績,對電影,她相當揀擇。

「我本來就係隨遇而安嘅人,無計劃,呢個係我弱點。」她說。

對於接拍馬浚偉講述自身經歷的母子情電影,顧美華套用小美一番話讚馬仔:「小美話馬仔好偉大,燃燒自己去照亮別人。其實佢係將自己嘅傷痛攞出嚟同大家分享,因為每個人都會遇到親人離世,情緒一樣會有咁波動,佢安撫我哋又好,鼓勵我哋又好,同我哋講一啲安慰說話又好,我覺得佢份心意好值得支持。」

事實,顧美華也同樣遇過親人離世。

09年,胞妹自殺身亡上了新聞,年半內,雙親亦相繼離去。十年時間過去,顧美華未能走出傷痛。

「走出傷痛好個人,好似我小時候,會覺得天下間最恐怖事情,就係媽媽離開,到媽媽真係離開,表面上我好似無問題,我已經服侍到老人家離世。但夜闌人靜時,我仍然諗緊一樣嘢,就係當日做得唔足夠,邊年邊月,我點解要咁樣做呢?幾時幾日,我點咁樣回答佢呢?原來都會跟住我一世,你話係咪釋懷呢?好多人話係情緒病,你可以標籤佢為情緒病,但係有分輕重。有啲人可以當無事,但係有啲人會如影隨形,好似其他人講「骨肉」,一直都會相連住。如果你問我對於父母離世,幾時可以釋懷,我話畀你知係放唔低。」她說。

家有四兄弟妹,現只有她跟兩個弟弟,顧美華說大家對這件事(親人離世)都選擇迴避,或像馬浚偉這樣,能夠同人分享,未嘗不是一件好事。

失去才懂珍惜,老套得不能再老套的人生哲理,過來人顧美華卻在實行。

「我而家對外唔會花太多心機,但對屋企人就會,當然佢哋個個都唔需要擔心,但有時會掛住某個人,我個大孫今年都二十歲,會諗吓個喺美國生活得好唔好,另外一個孫仔喺英國又過成點呢。」

這些年,其實她也過得很不錯,憑電影《美麗上海》拿了影后,演技備受肯定外,最大得着是她真正人投入享受拍攝過程。感情上,她也有領悟,第一段婚姻,因欠缺精神溝通而分開。第二段婚姻,她跟在美國土生土長的老公相處得自由自在,她明白到世界上沒有一個人會完全適合自己,所有事情都要靠自己調整。

-----------------------------

【壹週刊直播平台 ChannelNEXT】

立即睇

全城抗暴 區區論壇同你深度剖析

-----------------------------

【升級壹會員登記站 為你解疑難!】

親臨旺角、銅鑼灣做升級壹會員,即送「香港人:抗爭之夏」限量明信片

詳情地址