• 【郭富城2.0】第五代混種豹貓食生肉 旅遊達人Jerry C:好似養緊一隻活生生嘅豹
  • 2019-11-30    

 

幫過ViuTV主持旅遊節目嘅Jerry謝利,係一位旅遊達人,去過超過65個國家,除咗做旅遊節目主持,亦係好多品牌活動司儀及KOL。見到Jerry,會覺得佢有啲面善,有啲郭富城嘅影子,連佢自己都忍唔住答:「自小已經有好多人講。」



孟加拉豹貓

今次同jerry做訪問,因為佢養咗隻8個月大嘅豹貓Jager。Jerry說:「豹貓其實都有分好多唔同級數,呢一種叫做孟加拉貓,亦都係第五代混種豹貓,變成比較溫馴,可以俾人飼養嘅貓。養孟加拉貓其實唔使領牌,因為佢唔屬於F1類別。如果屬於F1就需要領牌同打齊防疫針,呢一種可以家養嘅孟加拉貓,其實就唔需要領牌,最緊要打齊所有針就可以。」Jerry因為朋友養咗Jager後,發現屋企三歲大嘅囡囡皮膚敏感,加上豹貓對比較活潑,需要經常「放電」,對小朋友嚟講係好難控制,所以Jerry就收養咗佢。



餵食生肉後毛色更靚

講到同Jager嘅感情,Jerry話:「呢五個月同佢嘅感情,我覺得好似自己個仔一樣。其實養豹貓或者養寵物都好,我覺得要擺好多心機落去,唔可以淨係攞返嚟,幫佢清潔大小便或者餵佢就算,我覺得真係需要用時間同佢培養感情,同埋教導佢。始終寵物同人類唔同,未必可以好了解人類思想,但如果養一隻寵物,想同佢建立默契,一定要花時間溝通。」Jager唔只外型似豹,連食嘅嘢都似,因為佢係食生肉嘅,咁Jerry餵貓食生肉,感覺係點嘅呢?「我覺得好似養緊一隻活生生嘅豹一樣,通常餵佢哋食生肉就最好嘅,因為生肉營養豐富好多,同埋貓嘅腸胃會直接吸收肉類嘅養份、油份,或者不同維他命,所以令貓貓腸臟排出嘅大便都係好靚嘅。同埋動物天生都係食肉嘅,只不過人類為咗方便,先至轉餵貓糧或者狗糧,但其實動物本身嘅腸胃係適合食生肉。我轉餵生肉之後,發覺最大嘅好處係,第一佢嘅便便健康咗好多,腸胃好咗好多,同埋毛髮變得好滑,因為肉類有天然油份,等於人類用咗護髮素一樣,所以貓貓嘅毛會變得好滑,抱佢上手,會好似攞住好滑嘅頸巾、絲巾,所以我自己都覺得,如果有時間同寵物相處嘅話,或者屋企有人長期可以幫忙餵貓嘅話,我都建議佢哋餵生肉。」



直擊餵食生袋鼠肉

就等我哋一齊睇吓,Jerry點餵Jager食生肉,唔好以為只係擺塊肉喺碟度畀佢食咁簡單,當中有好多細節要留意。「我而家準備餵佢食午餐,一日會食早午晚三餐,但每一次餵佢之前,都要先放佢入籠,因為每次食嘢佢都會好興奮,如果我唔困住佢,當我準備食物嘅時候,佢就會喺度搗亂,不過困住佢嘅時候,佢又會不停大叫。而家餵嘅係袋鼠肉,裡面除咗有肉之外,仲有袋鼠骨頭、內臟,同埋加咗啲蔬菜,令貓貓食袋鼠肉嘅時候,都可以吸收到唔同營養。首先要搓幾下,等貓貓容易啲食,唔會一大嚿好硬嘅肉。另外如果餵生肉俾貓食,佢哋就唔需要成日飲水,因為肉類本身含有水份,所以令貓貓食完之後,就覺得唔需要飲水。不過我都覺得貓飲多啲水會比較健康,所以通常都會加少少水,等佢食肉嘅時候都可以吸收多啲水。除咗肉之外,都會加一啲海藻粉,因為對貓貓嘅腸臟都會比較好,同埋食完之後毛髮都會更靚,而且腸胃會無咁容易敏感,都係一啲健康蔬菜。」



零食引誘訓練技能

好多人養寵物都會訓練佢有一啲技能,唔知Jerry有冇訓練Jager呢?「都有訓練佢一啲特別技能,最初點解會想訓練,係因為上網見到有一條片,見到原來貓都識得遞手,同埋叫佢sit就會坐,「砰」一聲就會瞓落地,又或者叫佢轉圈、跳過障礙物,原來都可以嘅。我覺得豹貓係比一般貓醒目,同時會明白人類指令,所以我覺得其他人都可以,自己都嘗試訓練吓佢,可唔可以聽到人嘅指令。第一個聽到人嘅指令就係sit,之後就係hand hand,最近訓練到佢聽到「砰」一聲之後識得坐喺地下,然後就餵佢食嘢。」平時Jerry除咗會同Jager喺屋企玩,仲會帶佢出街行吓散吓步見吓人,當佢狗仔一樣帶出街,Jager好受街坊歡迎!「每星期都有三、四日帶佢落街,就算唔係落街散步,都會帶佢去附近一間cafe,嗰間cafe好好,好歡迎主人帶埋寵物去食飯,所以lunch時候都會帶佢去行吓。有時候放假得閒嘅話,都會揸車帶佢去公園、海旁,等佢可以行吓。」

採訪:肥A

攝錄:蕭敬漁

-----------------------------

【壹週刊直播平台 ChannelNEXT】

立即睇

全城抗暴 區區論壇同你深度剖析

-----------------------------

【升級壹會員登記站 為你解疑難!】

親臨旺角、銅鑼灣做升級壹會員,即送「香港人:抗爭之夏」限量明信片

詳情地址