• 【非攻】重新出發(黃秋生)
  • 2019-11-26    

 

我唔係有心倒米,更不是存心柴台,我唔懷疑拍宣傳片嘅一眾藝人對香港嘅關心及熱愛,我只係對文字語意同邏輯有啲過敏,聽到啲語意不清嘅句子硬係周身唔舒服。尤其是宣傳「重建香港」喎,用詞不當等於概念錯誤,唔講下唔自在。

幾十個藝人拍咗條片,一人一句宣傳重建香港,其中有句係「重新出發,重建我哋認識嘅香港。」,大家可能唔覺有乜問題,我聽到嘅即時反應係:講乜呀?

試用呢個句式,再造幾句句子俾大家睇下,就知我點解咁一頭霧水。

「重新出發,重讀一次我哋認識嘅課程。」

「重新出發,重過一次我哋認識嘅人生。」

「重新出發,重食一次我哋尋日食過嘅食物。」

先講重新出發,時間係向前嘅,起碼喺我哋呢個三維空間入面係向前嘅。所謂重新出發,唔可能係回到過去,從頭再來。就算尼采講嘅「永劫回歸」真係存在,都唔知要等幾多億萬劫後先有,點輪到你隨口講兩句就可以從頭嚟過?

行山可以從頭嚟過,睇嘅風景好似同以往差不多,但係其實絕不一樣,昨日之日不可留,天氣唔一樣,同行伴侶不一樣,着件衫又不一樣,其實連風景都同昨日不一樣。每次重覆發生,其實必然要重新認識,如果同以前一樣,有乜重新嘅價值?

不過有好多人都經常懷緬過去常陶醉嘅,幾十歲人着返十幾歲嘅衫啦;老來講舊史啦;不斷結婚又離婚啦;重新開始,又重蹈覆轍。

重新開始,當然要建設一個重新認識嘅香港,比起以前更好更公義嘅香港,唔係借來時間嘅香港,充滿古惑仔同醒目仔嘅香港。若果真係可以重建一個我哋認識嘅香港,打算回到乜嘢年代呢?英治時期?清朝?情何以堪哦!



作者簡介:

黃秋生,字秋生、號秋生哥、影帝、黃哥、黃老師⋯⋯等等。香江灣仔人也,生時,毫無異象,亦無大蛇入屋,只見呱呱墜地,肥肥白白。時值仲秋,因而為名。幼時,頑劣不堪,教而不善,精力過人,常上山下海,破壞王也。未冠,變本加厲,不學無術,言不及義,好行小慧,目中無人。秋少負氣節,立志遠大,唯願終生無所事事,游手好閒,不勞而獲,好食懶飛。及後,竟因緣際會,負芨演藝學院。風起雲湧數十年。到如今,千帆過盡,一事無成,落花流水春去也。唯一生愛看書,雖不求甚解,無立德立言,然亦未作低三下四,奴顏婢膝之事。足以慰平生,曰:人也!

-----------------------------

【壹週刊直播平台 ChannelNEXT】

立即睇

全城抗暴 區區論壇同你深度剖析

-----------------------------

【升級壹會員登記站 為你解疑難!】

親臨旺角、銅鑼灣做升級壹會員,即送「香港人:抗爭之夏」限量明信片

詳情地址