• 【非攻】使唔使衰成咁?(黃秋生)
  • 2019-11-03    

 

贏人先要贏自己,呃人亦先要呃自己。多月嚟,警方無論喺記者會上,或者執勤現場嘅表現,都有目共睹,所有言行,變作笑話,未到萬聖節已經成為小丑。

再分析佢哋因何從蝙蝠俠化為小丑,已經毫無意義,再講道理亦無道理可循,佢哋已經神憎鬼厭,在極多市民眼中,面目可厭到極。做事正確固然應受到讚揚,就算做壞人亦可以盗亦有道,唔使搞到自己衰成咁:打女人、恰細路、粗口爛舌鬧阿婆、與途人嗌交,圍毆手無寸鐵市民,拘捕少女形似抽水、講大話、冇禮貌,知識水平低下卻向大學生、上司,甚至行政首長指手劃腳,佢哋可以唔同意我嘅觀點,但係喺衆人眼中,佢哋的確係咁,而且仲被拍攝紀錄,有片為證。

政府幾十年嚟,到底花咗幾多時間、金錢,去建立警察形象?三代警員嘅努力,先至可以從「死差佬」改變成為受人尊重嘅亞洲第一警察。從我少年時代,開始有《警訊》;少年警訊;警方到學校宣傳;社區公關。電影中嘅正面英雄形象,喺我剛入行於亞洲電視做靚仔嘅年代,大家都以得到一個 CID 角色為榮。

我亦有一啲叔伯輩朋友仔,甚至好兄弟係警察,雖然佢哋冇電影中成龍咁打得,亦冇李修賢咁威猛,但係個個都唔係衰人,有時仲有啲正義感。當然,我唔認為而家啲警察全部都係黑警,但係一粒老鼠屎,已經足夠整衰成鑊粥,何況個經理仲話:粒老鼠屎只不過係芝麻,對身體有益,如果你有問題,可以向我老闆投訴,但首先你要知到鑊粥係邊個廚師煮嘅,同埋要證明呢粒俾我食咗落肚嘅係屎,仲要揾到隻痾屎嘅老鼠先得。

警方記者會嗰幾位阿蛇,我相信佢哋唔係壞人,起碼佢哋冇做壞人嘅天分,壞人唔會𠲖𠲖哦哦,前言不對後語,又多口誤(潛意識驅使下講咗真話),例如最近記者會中,被記者用強光照射下熄燈離場,講咗句:呢個係我哋主場。我相信佢哋真心認為嗰個係佢哋個場,不過可惜唔係,嗰個只係警方嘅記者會,而記者會喺屬於全港市民嘅。

當然,警察都係持份者,但係唔係持有者,話你知,連警隊都唔係屬於警隊嘅,警隊係屬於香港政府嘅。若果你班蛋散,真係覺得警隊可以從政府獨立出嚟,不受控制,仲可能控制政府的話,你哋就係發緊春秋大夢,而且咁,係稱之為:警獨!



作者簡介:

黃秋生,字秋生、號秋生哥、影帝、黃哥、黃老師⋯⋯等等。香江灣仔人也,生時,毫無異象,亦無大蛇入屋,只見呱呱墜地,肥肥白白。時值仲秋,因而為名。幼時,頑劣不堪,教而不善,精力過人,常上山下海,破壞王也。未冠,變本加厲,不學無術,言不及義,好行小慧,目中無人。秋少負氣節,立志遠大,唯願終生無所事事,游手好閒,不勞而獲,好食懶飛。及後,竟因緣際會,負芨演藝學院。風起雲湧數十年。到如今,千帆過盡,一事無成,落花流水春去也。唯一生愛看書,雖不求甚解,無立德立言,然亦未作低三下四,奴顏婢膝之事。足以慰平生,曰:人也!

-----------------------------

【你爆料,我課金!】

爆相:$500 爆片:$1,000

分清黑白 壹齊揭穿社會黑幕!

詳情: https://s.nextmag.hk/e/zg7VUk287Z

-----------------------------

【壹週刊Telegram,與港人同行,每日為你推送抗爭現場實況】

一手報料 https://t.me/nextmaghk

最新消息 https://t.me/NextPlushk

-----------------------------

【升級壹會員登記站 為你解疑難!】

沙田、旺角、荃灣、觀塘、銅鑼灣5區為你服務

詳情: https://s.nextmag.hk/e/Tssefy687Z