• 【《假設性無罪》阿齊】講咸濕嘢也講現實 強尼:我非十八廿二,追夢先要餵飽家人
  • 2019-11-04    

 

ViuTV劇集《假設性無罪》圍繞辦公室性騷擾,其中「阿齊」一角口沒遮攔,常把咸濕笑話掛在嘴邊,令女同事十分尷尬。「阿齊」雖然衰衰格格,但站在觀眾立場,不會覺得他乞人憎,反而幾抵死,畢竟真小人往往好過偽君子。其實,他是如何想出那麼多語帶相關的黃色笑話的呢?飾演「阿齊」的強尼相信,每個人骨子裡都有「諗衰嘢」的時候,只要把它放大,就可以有咁衰得咁衰。

「編審喺設計呢個角色嘅時候同我講,佢話想呢個角色嘅對白好衰,叫我哋喺現場幫手加料,我話呢啲當然無問題。我覺得每個人內裡都有呢個部分,只係多少嘅分別,身體總有諗衰嘢嘅時候,你就放大佢,所以自己寫嘅時候,就有咁衰寫咁衰。至於話點樣做功課,其實都係留意身邊嘅人,未入行前其實做建築,地盤最多就係麻甩佬,口衰嘅麻甩佬就特別多,所以呢種氣氛我好熟悉。」強尼說。



基於每個人的接受程度不一,因此性騷擾範疇可以很闊,簡單至一句「靚女,今日好索喎」,對某些人而言都可以是性騷擾。假如不是拍戲,有些對白,女演員未必能接受,強尼也未必說得出口:「佢哋(女演員們)有鄙視我哋㗎!雖然睇過劇本明知係對白,但親耳聽到都會覺得難受,會話:『呢句真係好衰呀!』有一場戲係現場夾嘅,講述我哋喺長枱開會,話王敏奕咁索一定簽到份合約返嚟啦,接住有啲碎嘴。之後小占(英健朗)問應該簽邊度,話支筆無墨然後喺度chok下chok下。其實真係現場度出嚟,最初試嘅時候,後排嘅王敏奕、Hailey(陳俞希)、Mishy(李昭南)就話我哋真係好變態!」其實,變態不是壞事。連明知只是對白的女演員聽到後也覺得乞人憎、很變態,足以證明一件事,方向正確!



認識強尼的觀眾,大至可分為三個階段:有線講波的遠古時代;主持ViuTV大小節目的近代;飾演《假設性無罪》「阿齊」的現代。無論哪個年代,強尼坦言「把口有少少衰」、「離唔開唔正經」,都是他個人風格、予人的感覺。主持雖多,演戲卻是初哥,但「阿齊」一樣入型入格,令觀眾覺得這「新」演員幾好戲。是角色與己相似無難度,還是原來演戲也踢天才波?

「唔係唔難,其實都困難嘅,但樂趣比困難大好多!因為如果由做體育主持開始計算,其實已經做咗十四年,好多類型都做過,都會有種好熟練嘅感覺,當熟練嘅時候就會缺乏新鮮感。但拍劇每次都好新鮮,每次嘅對手、班底都唔同,所以你問我嘅話,我覺得每一次都好好玩。至於有冇難度?我覺得自己好好彩,不過我覺得都幾正常,除非初出道就做男主角,一開始就要handle一件好困難嘅事。我哋通常都係由比較少戲份,例如一場一句對白,開始慢慢接拍第二套三句對白,第三套五句對白,就有機會俾你慢慢捉摸,喺前輩身上學嘢。」或者如玩數獨,不是不難,但以挑戰甚至享受的心情,會易很多,更會愛上。強尼也一樣,挑起了演戲條癮,難,但想拍多啲。



據知,在拍攝《假設性無罪》前後的時間裡,劇集方面,他參與了王貽興和劉翁負責的《黑市》,還在港台兩個單元劇分別飾演暴躁丈夫,以及兒子有幻覺的父親。電影方面,較多戲份的有《二次人生》;客串的有鄭保瑞導演《智齒》、陳木勝導演《怒火》。照情況看,機會看似不少,應該可以放心吧?不!強尼擔心,他說四十幾歲才出道當演員,能不擔心嗎?

「我經常覺得,呢個年紀嘅男演員,我當然算遲出道,其實好多少則已經演咗十幾年,多則二十幾年起,所以呢個年齡層嘅男演員,其實演戲嘅質感同質素,我覺得喺市場上已經有一定水平,咁點解仲要搵我呢?我會經常提醒自己,呢個年紀嘅男演員,全部都係前輩,喺行內做得好好,如果希望自己佔少少席位,或者將來仲有演出機會嘅話,必須要達到導演對角色預期嘅質感,我自己覺得好重要,所以真係要靠進修。我本身都有進修,報讀一啲戲劇班,希望可以喺拍攝時達到導演對角色嘅要求。」



擔心演得好不好還不夠,還要擔心不讓家人餓肚子,自己才能夠安心繼續演藝路,畢竟「男人必須要照顧屋企」!他說:「而家有做好多工作,例如有自己嘅production house、電台、講波、ViuTV節目,我覺得咁樣個人感覺會實在好多,即係個心會定啲,係只要你肯跑、肯捱、肯搏,仍然有個基本控制到嘅範圍。其實有份穩定工作對家庭好重要,因為身邊人如果見到你無工作,收入唔穩定,佢想點樣支持你都無用,係真嘅,好現實。自己唔係二十歲嘅階段,無飯食就喺屋企煮個麵,已經唔係嗰種年紀同生活。就算自己可以捱餓,但點可以叫屋企人捱餓呢?做任何事唔可以淨係滿足自己想法,做男人必須要照顧屋企。所以,愈想做自己喜歡嘅工作,必須要做其他嘢去鞏固呢件事,呢個係我嘅體會!」

仍覺得強尼為人嘻嘻哈哈唔正經?這點,與《假》劇的「阿齊」很似,你以為他衰衰格格無嚟正經咩?最後卻發現「阿齊」是痴心情長劍,還會煮飯給女兒吃,連袁姐(李焯寧飾)見到也心動嗒糖。套用唐伯虎一句:別人笑我太瘋癲,我笑他人看不穿。



採訪:Ethan

攝錄:蕭敬漁

服裝(眼鏡):BLACKZMITH Optical

+5

-----------------------------

【2019 區議會專題】

最齊全區議會入閘名單 互動民調

11.24 用選票重奪區議會

-----------------------------

【升級壹會員登記站 為你解疑難!】

沙田、旺角、荃灣、觀塘、銅鑼灣5區為你服務

詳情地址