• 【非攻】故意嘅(黃秋生)
  • 2019-10-27    

 

化學藍水射清真寺。警方話啲水唔會影響人體,有人叫佢哋飲兩杯落肚睇下有冇事?我認為咁講偏激咗啲,求其叫佢哋用嚟冲個凉睇下有冇事咪算囉,使乜解釋得咁辛苦,越解越緊。

自細媽媽教我唔好鬧人,佢話咒人嘅語言會反彈返喺自己身上,我唔信,邊有咁神奇?呢幾年見證多咗,可能真係有呢種自然法則,希望科學家可以研究下,例如林鄭呢句名言:「全部都係廢話」而家就應返喺政府身上,無論佢哋講乜,用乜嘢理由解釋,市民都當係廢話。

不過唔使認真思考,單憑字面好難唔覺得係廢話,但廢人講嘢唔會認為自己講廢話,正如聰明人都唔會周圍話畀人知佢好聰明一樣正常、合理。 乜嘢「電光火石」 ;乜嘢「驅散過程中誤中」;乜嘢「無可選擇」;乜嘢「門外聚集人群未有離開」;乜嘢「打中個門口,並非向住清真寺」⋯⋯原來一切目的,只係「想保護清真寺」。

多個月嚟,政府無為自己嘅錯誤道歉過一次,咁講係錯嘅,又唔好咁屈佢哋,好似係有一次。不過啲低級衙差,以為自己真係大總統(都話佢哋係軍閥㗎啦),話個上司唔可以代表佢哋,咁仲唔係兵變?可惜政府文官又軟弱,屁都唔敢放一個,咪由佢班馬騮屎忽稱大王囉。

今次打中阿拉間聖殿,道歉嘞。不過鬼祟道歉,跟住啲衙差照樣話驅趕暴徒,究竟係同政府扯貓尾,定係警隊真係獨立咗呢?係咪可以稱之為「警獨」?藝術鑑賞好大歧異空間,主觀性強;法治規則就要睇人證物證,一點含糊不得。有晒片、有晒證人、當事人,都可以亂咁噏,你係宋世傑呀?事出有因,查實無據。放人!真係同呢啲人講道理都嘥氣 ── 真係好容易咁諗 ── 千萬唔好,當你因住佢哋荒謬、無理、白痴,於是你又反智、野蠻、低能嘅時候,你就變成同佢哋嘅同類。

你有張良計,我有過牆梯;你係宋世傑,我係倫文敘。乜嘢技術性驅散乜嘢車話(都記唔到個名啦)刀就刀啦,乜嘢食物處理金屬啫?當架水炮車慢吞吞停低,慢慢瞄準,發射化學水嘅時候,點樣電光火石法?驅散過程中「誤中」時,係驅散乜嘢?十個八個企喺門口保護清真寺嘅人。

你驅散保護清真寺嘅良民(毛漢先生有政府認證㗎)去保護清真寺?然後追住人射係第二次誤中?連警告都未講完就發射,你架車處境好危險咩?有追擊炮對住你呀?或係控制嗰個其實係看更?冇經驗、好驚、好緊張?射向門口唔算係射清真寺,乜清真寺門口唔係屬於清真寺嘅咩?咁啲人圍警署、掟彈入停車場、燒門口,你又識得話攻擊警署?

你打人就愛撫,人打你就謀殺?乜嘢叫公平執法?攻擊一樣嘢去保護一樣嘢,心理變態先會咁做。但我相信,佢哋射清真寺唔係心理變態,係故意嘅。



作者簡介:

黃秋生,字秋生、號秋生哥、影帝、黃哥、黃老師⋯⋯等等。香江灣仔人也,生時,毫無異象,亦無大蛇入屋,只見呱呱墜地,肥肥白白。時值仲秋,因而為名。幼時,頑劣不堪,教而不善,精力過人,常上山下海,破壞王也。未冠,變本加厲,不學無術,言不及義,好行小慧,目中無人。秋少負氣節,立志遠大,唯願終生無所事事,游手好閒,不勞而獲,好食懶飛。及後,竟因緣際會,負芨演藝學院。風起雲湧數十年。到如今,千帆過盡,一事無成,落花流水春去也。唯一生愛看書,雖不求甚解,無立德立言,然亦未作低三下四,奴顏婢膝之事。足以慰平生,曰:人也!

-----------------------------

【你爆料,我課金!】

爆相:$500 爆片:$1,000

分清黑白 壹齊揭穿社會黑幕!

詳情: https://s.nextmag.hk/e/zg7VUk287Z

-----------------------------

【壹週刊Telegram,與港人同行,每日為你推送抗爭現場實況】

一手報料 https://t.me/nextmaghk

最新消息 https://t.me/NextPlushk

-----------------------------

【升級壹會員登記站 為你解疑難!】

沙田、旺角、荃灣、觀塘、銅鑼灣5區為你服務

詳情: https://s.nextmag.hk/e/Tssefy687Z