• 【香港移民潮】一年住七天 5年後入籍歐盟 80後夫婦 430萬葡萄牙買機會
  • 2019-10-11    

 

雖然林鄭徹回反送中,但那邊廂又推出緊急法,赤裸裸破壞香港法治。港共的醜陋橫盲,令香港回不到過去,很多人再次萌生移民的念頭。「有得走,好走喇。」成為了大家掛在口中的問候句。

除了台灣、澳洲、加拿大等熱門移民地區,近日葡萄牙忽然成為大熱,不少人貪其紙水低,無年齡、學歷限制、四至六星期就獲批。葡萄牙為引入外資推出黃金簽證,最低28萬歐元(約248萬港元)便可以投資移民方式換取葡萄牙居留權,取得居留權後只需在5年內平均每年居留7天便能申請即可申請永久居留。住滿六年並通過葡萄牙語考試,即可申請入籍歐盟,成為移民往其他歐洲城市的跳板。

現職文員的Ivy一家屬中產小康之家。自2014年佔中事件後開始考慮移民。身為80後的她排除了門檻高的國家後決定選擇葡萄牙,並於明年正式舉家搬遷。「因為佢比較Flexible 啲,唔使坐移民監,變咗我哋可以決定幾時走唔走。」「因為始終香港仲有工作,未必咁易可以輕易離開。但係經歷左幾年之後,其實個心態都變咗。除咗我哋自己都有小朋友,生完小朋友之後都會諗多咗好多嘢,無論生活小朋友嘅讀書,或者我哋一個家庭轉個環境、醫療和成個社會狀況。」

葡萄牙物業投資移民中門檻最低的便是以28萬歐元翻新連購買當地樓宇,但條件是該樓齡需要超過30年及屬低人口密度區域。不過偏遠地區投資價值也低,所以較少人選擇。除此之外,亦可購入35萬至50萬歐元的當地物業或選擇購入超過35萬歐元的基金。香港人最喜歡投資磚頭,Ivy選擇以50萬歐元(折合約431萬港幣)投資兩座房地產便可三代一同定居葡萄牙。「因為佢冇限我要買幾多層,所以我哋就諗想分散啲會安全啲,就分咗兩層樓去買。買夠一定數量,夠左50萬就可以申請Golden Visa(黃金簽證)。」黃金簽證即代表可以於日後入籍其他歐洲國家。

葡萄牙當地物業市場相對不及香港成熟,未有整合系統數據可監控樓市成交。Ivy為求心安也試過買賣一個細單位,「想試吓到底係咪安全,啲錢係咪可以翻返嚟香港。嗰時嘅經驗都有利潤返嚟。但係我哋心態唔係諗住炒樓,純粹當地市場俾我哋睇到都算係穩步上升緊。」

代理人失蹤

購買物業後,大多數業主也會考慮放租賺取利潤,但亦需留意當地的兩種地產稅。當地交易稅(Municipal Property Transfer Tax)為交易價值的6.5%,是在購買地產當時需繳付的。如果房地產用作自住,交易稅稅率則為6%。其次為房地產稅(Municipal Property Tax),需每年繳交。稅率根據房地產所在區域不同而有差異,一般在0.3%至0.5%之間波動。Ivy與丈夫每年也會穿梳葡萄牙和香港三至四次,人在異地期間很多事不能親自主理,買樓後只能依靠物業管理及當地會計師負責跟進。Ivy表示過程亦有中伏經驗。

她在購入物業後安排當地物業管理公司幫忙出租:「試過遇人不淑,即係佢哋會失蹤,其實會令到我哋好麻煩,因為間屋係佢哋手,最後都係不愉快收場。」最後她只好馬上轉另一間公司代理。她亦曾遇上失信的會計公司和稅務代表。「因為當時我哋諗住經會計公司做報稅,亦都親身去過當地葡萄牙見過面,都會覺得諗住可靠,結果最後畀晒攞個人稅務資料及戶口密碼等之後就一直聯絡唔到,失咗蹤,令到我哋覺得好徬徨。」雖然她亦馬上轉另一間會計公司協助,但這間公司竟然將他們所有收入都打做最重稅,從中作梗藉此過河濕腳。幸而最後她從中透過朋友介紹下認識另一位可靠的律師代理後才安心。她表示自己沒有找移民公司代辦,一切經驗都是靠自己闖蕩得出,因此特意開設「葡萄牙香港人 Portugal Hongkonger」的Facebook專頁分享移民心得。

IT人成葡國新寵

10年前歐債危機葡萄牙經濟崩潰。如今債務纏身的「歐豬」葡萄牙華麗變身,去年經濟增長創10 年新高。截止到2019年8月31日,透過「黃金居留許可計劃」獲得葡萄牙黃金簽證的家庭已達13364個,投資總金額已超過48億歐元。其中,通過購置房產獲得身份的人數為7431個(約佔總人數的94%),投資金額約為43億歐元。

嫁到葡萄牙的香港女生嘉嘉同樣開設Facebook專頁「ahloandpojai」分享葡國點滴。她表示,葡萄牙政府除了積極推廣投資移民,亦推出政策留住年輕勞動力:「佢地好多係度讀Tech嘅人係好搶手,葡萄牙出去IT人有公司係即刻請,或者請晒。所以佢依家就吸引返你們回流,返黎開公司或start up,令經濟好返好多。政府除左呢個policy之外仲有比左allowance係6400歐吸引你返黎,你可以claim你返黎用嘅錢,所以葡萄牙經濟上升得好快。」葡萄牙2019年6月失業率為6.7%,目前每月最低工資是600歐元。至於葡萄牙較高薪的就業領域分別在信息技術、醫藥、法律和工程等領域每月工資約1000歐元,已可過上優質生活。嘉嘉續稱,政府近年大力推動創新科技,為年輕人創造工作機會,因此IT專才在葡萄牙相當吃香。

葡萄牙的福利制度完善,港人關心的醫療及教育亦有政府資助。葡萄牙實行12年免費教育,教育體系主要分為學前教育、小學教育、初中教育、高中教育和大學教育5個階段。但需要留意的是葡萄牙主要語言為葡萄牙語,因此當地公立學校都是以葡語為主要語言。嘉嘉表示正考慮安排女兒入讀當地自資的國際學校,令女兒可在英語教育環境中成長。「佢地好多國際學校比英國平好多,呢度可能係二至三萬港元一年,香港人應該都能負擔得起。」嘉嘉為女兒開設「阿路葡仔圖」Facebook專頁記錄女兒成長及分享葡國生活資訊,她亦希望能凝聚更多香港人成互助社區。

移民查詢數字倍升

資深移民顧問胡康邦表示自從係六月份開始,移民公司每個月查詢宗數都接近1000宗,比過往多了三至四倍,成功簽的單每個月亦增加三至四倍。胡康邦表示以上選擇最受港人歡迎的,便是直接購入50萬歐元的物業,佔移民個案近九成。皆因葡萄牙首都里斯本(Lisbon)多遊客和留學生,很多業主會在里斯本購入物業後會將幾千呎單位分租,如作學生宿舍、精品酒店、前舖後居等,租金回報為5至6厘,移民之外亦可作穩定收入。

入籍歐盟也非一步到位,由投資至成功移民整個過程需時五年。住滿六年後亦需通過葡萄牙語等級水平測試方能入籍。要留意的是,英國即將脫歐,假如希望透過有葡萄牙萄到入籍英國,可能性大大降低,而假如要到其他地區生活,如法國,或德國等,亦最好學定當地語言,因此及早選定想去的歐洲城市,幫助日後更容易融入當地生活。

胡康邦認為移民並非走進完美國度,計劃移民前需考慮清楚潛在問題。「如果你決定某個國家嘅時候,做一啲探路係需要嘅,了解當地風土人情,同埋了解佢地經濟發展好重要。親身體驗係非常重要。都係正如我講啦,你係移民新國家,應該多交朋友,多去接觸外面。」

撰文:葉嘉兒

插圖:亞火


-----------------------------

【你爆料,我課金!】

爆相:$500  爆片:$1,000

分清黑白 壹齊揭穿社會黑幕!

詳情: https://s.nextmag.hk/e/zg7VUk287Z

-----------------------------

【壹週刊Telegram,與港人同行,每日為你推送抗爭現場實況】

一手報料: https://t.me/nextmaghk

最新消息: https://t.me/NextPlushk

-----------------------------

【升級壹會員登記站 為你解疑難!】

沙田、旺角、荃灣、觀塘、銅鑼灣5區為你服務

詳情: https://s.nextmag.hk/e/Tssefy687Z