• 【非攻】歌詞 (黃秋生)
  • 2019-09-30    

 

《願榮光歸香港》一曲最近被改成「止暴制亂版」歌詞,想同大家分析一下歌詞内容。

分析前,首先想問下呢班(愛香港文化藝術工作者),其實知唔知版權係乜?用人首歌有冇俾錢?有冇問過作者?若冇,係咪犯法?若係,咁係咪愛香港就可以犯法?

不過咁,我其實認同有啲作品喺某種情况之下,係可以戲仿同運用嘅,例如有啲作品,創作目標係畀某種情況嘅,又或者原作人冇出聲反對。呢個(愛港版)好明顯兩種情况都不符合,請你不要愛我,唔該哂。

歌詞分析 ──「何以這褔地被破壞」,係囉!我都想知,何以呢呵?你話我破壞,我又話你破壞,各自陳述係講唔出個道理來嘅,一、要用証據,二、要用邏輯,可能仲有三四五,(暫時諗唔到),冇理據,方法辯論,只係街市嗌交,多講無益。凡抗爭嘅都係暴徒?只有佢哋在破壞?如果所有抗爭者都係暴徒,你哋早就瓜哂啦,仲有機會咁爽盜版咩?衝入地鐵用棍用藤條打人算唔算暴徒?意圖掟人落天橋算唔算暴徒?打到人隻手啲骨碎哂,得番層皮黐住算唔算暴徒?先唔講先後,甲方嘅係暴,乙方嗰啲做乜唔係?你話唔係就唔係?

賊佬教仔,偷嘢唔緊要,最緊要唔好俾人見到;俾人見到都唔緊要,最緊要唔好俾警察拉。拉唔到,就等如你冇犯過法──法理上係,道德上唔係,不過我諗班友都冇乜道德,有就唔會恰細路、打女人啦。對佢哋死咗條心。

「何以要扮成極偉大」,點扮?邊個扮?有訴求就係扮偉大?跪求放過年輕人係扮偉大?比你班友打到爆哂缸、一面血係扮偉大?還是被拉去新屋嶺刑場係扮偉大?咁樣扮偉大法有乜着數?反之,打完人仲可以同不知所謂嘅警察握手搭膊頭,似係扮偉大多啲,雖然其實佢哋扮緊契弟,演錯戲。

歌詞太長,太精彩,下期再續。慶幸呢首翻版名曲放上YouTube 一日下架。有可能唔駛畀錢。唔緊要,好似啲電影片蛇(編註),拍電影唔係用嚟上映嘅,拍嗰陣已經袋咗好多。恭喜發財!



編註:

即電影開拍前,製作人向非業界投資者集資,以確保不用擔心發行票房賣埠成績下必然獲利,因無壓力,通常拍成爛片。



作者簡介:

黃秋生,字秋生、號秋生哥、影帝、黃哥、黃老師⋯⋯等等。香江灣仔人也,生時,毫無異象,亦無大蛇入屋,只見呱呱墜地,肥肥白白。時值仲秋,因而為名。幼時,頑劣不堪,教而不善,精力過人,常上山下海,破壞王也。未冠,變本加厲,不學無術,言不及義,好行小慧,目中無人。秋少負氣節,立志遠大,唯願終生無所事事,游手好閒,不勞而獲,好食懶飛。及後,竟因緣際會,負芨演藝學院。風起雲湧數十年。到如今,千帆過盡,一事無成,落花流水春去也。唯一生愛看書,雖不求甚解,無立德立言,然亦未作低三下四,奴顏婢膝之事。足以慰平生,曰:人也!

-----------------------------

【你爆料,我課金!】

爆相:$500  爆片:$1,000

分清黑白 壹齊揭穿社會黑幕!

詳情: https://s.nextmag.hk/e/zg7VUk287Z

-----------------------------

【壹週刊Telegram,與港人同行,每日為你推送抗爭現場實況】

一手報料: https://t.me/nextmaghk

最新消息: https://t.me/NextPlushk

-----------------------------

【升級壹會員登記站 為你解疑難!】

沙田、旺角、荃灣、觀塘、銅鑼灣5區為你服務

詳情: https://s.nextmag.hk/e/Tssefy687Z