• 【非攻】黃色物體(黃秋生)
  • 2019-09-25    

 

警察記者招待會越嚟越黐線,越嚟越荒誕。從𠲖𠲖哦哦到而家嘅黃色物體(yellow object),到底佢哋知唔知喺全世界人面前上演緊醜劇?點解可以咁唔知醜?咁無恥?你唔係以為用平時呃你條白痴女嗰啲歪論,就可以令市民相信呀?什麼我唔講大話嘅,不完美但係可接受,留返出軌畀老婆斷正嗰陣同佢講啦。

今次真係終極一醜,揾個外藉鹹水警司出嚟,以為講英文高級啲,點知都唔知係咪三K嚟嘅。唔知佢色盲,定係種族歧視,居然話群警察喺度踢緊個黃色物體,但係我哋見到個(物體)係橙色㗎喎,(物體)嘅皮膚就黃色嘅。

兩條片,同一個地方,一條多人圍住你仲可以話發雞盲睇唔清楚,另一條好清楚係一個受咗傷冇反應嘅黃種人,不如咁啦,講大啲,其實嗰個係日本人,啲警察喺度抗日,或者其實拍緊戲,反正你叫人出嚟指證,都冇人敢出嚟,講到幾荒謬都得。

其實仲可以咁講,單純睇畫面我哋冇辦法證明任何嘢,圍住及打黃色物體嗰班可能係暴徒扮嘅,因為佢哋又唔讀書、又唔做嘢、盲字唔識多個、又非常仰慕警察,因為聽講警察可以草「管」人命,所以今日就扮起警察上嚟。呢啲係我朋友個朋友嗰三叔公講嘅(唔知老番有冇三叔公?)暴徒除咗有免費性交之外,仲提供免費毒品,可能佢哋隊爆咗,於是圍住個黃色物體係咁踢。

警察係唔會喺公眾地方襲擊人咁愚蠢嘅,佢哋打人,係唔會畀你哋見到嘅,見唔到即係冇啦。更加唔會圍住個黃色膠袋猛踢,如果會,嗰個黃色物體一定喺人,不過大家對人嘅定義好唔同,有啲人會稱之為黃色物體嘅。所以,嗰班所謂警察係暴徒扮嘅,被踢嗰個係黃色物體,佢可能係一個人,但係因為佢係黃種人,所以佢係黄色物體。

後來喺同一地方影到,流哂血冇反應嗰個,只係一個暴徒踢黃色物體踢到流晒血啫,我哋拘捕咗佢嘞,罪名係:非法襲擊黃色物體,我同時呼籲拍攝嘅人出嚟,幫助警方調查你,我哋好有興趣想知條片係邊個契弟拍嘅,因為你影響警察形象,我哋邊有咁愚蠢㗎?(呢句佢自己講嘅) 我會好似以前啲外藉警司咁,大大力咁踢你籮柚,你班黃色物體。

以上大部分都係我發夢見到嘅。



作者簡介:

黃秋生,字秋生、號秋生哥、影帝、黃哥、黃老師⋯⋯等等。香江灣仔人也,生時,毫無異象,亦無大蛇入屋,只見呱呱墜地,肥肥白白。時值仲秋,因而為名。幼時,頑劣不堪,教而不善,精力過人,常上山下海,破壞王也。未冠,變本加厲,不學無術,言不及義,好行小慧,目中無人。秋少負氣節,立志遠大,唯願終生無所事事,游手好閒,不勞而獲,好食懶飛。及後,竟因緣際會,負芨演藝學院。風起雲湧數十年。到如今,千帆過盡,一事無成,落花流水春去也。唯一生愛看書,雖不求甚解,無立德立言,然亦未作低三下四,奴顏婢膝之事。足以慰平生,曰:人也!

-----------------------------

【你爆料,我課金!】

爆相:$500  爆片:$1,000

分清黑白 壹齊揭穿社會黑幕!

詳情: https://s.nextmag.hk/e/zg7VUk287Z

-----------------------------

【壹週刊Telegram,與港人同行,每日為你推送抗爭現場實況】

一手報料: https://t.me/nextmaghk

最新消息: https://t.me/NextPlushk

-----------------------------

【升級壹會員登記站 為你解疑難!】

沙田、旺角、荃灣、觀塘、銅鑼灣5區為你服務

詳情: https://s.nextmag.hk/e/Tssefy687Z