• 【非攻】共同概念(黃秋生)
  • 2019-09-03    

 

沒有共同概念真係冇辦法討論溝通,嗌交就冇所謂,一句你娘親,一句你老母,反正别人如何理解都唔緊要,嗌交只係鬥野蠻,鬥大聲。

有人話大聲唔等如冇禮貌,呢個宇宙中,得一個人大聲講嘢時係有禮貌架啫,就係發哥。其他人大聲正正係冇禮貌,冇教養嘅表現。點解啲讀書人、教授、知識分子講嘢陰聲細氣?除咗平時少做運動,只係讀書之外,細聲講嘢代表真心温柔、有禮、有教養。

街市從業員、建築業操作員,因工作環境及工作性質需要,一般都音量較大,雄性荷爾蒙充足,亦冇必要特别有禮貌。不能想像?試放大音量講句:「多謝晒呀陳師奶。」陳師奶只會俾你嚇親,唔會覺得你有禮貌。

所以大聲講嘢,真係唔等如有禮貌,尤其是現今「大聲公」都可以當作攻擊性武器嘅年代,遲啲睇怕大家唔可以帶聲帶出街。所以概念不同,真係不能溝通,你所謂飯者佢所謂屎;你所謂枱者佢所謂櫈。係人都知係筆;佢偏偏話係鎗,鎗呢?佢又話係發射器。一般人都用手去推、用腳去踢,有部分好特别嘅人,用腳去推用手去踢,用個屁股去食飯用個口去排泄。

咁嘅人,你覺得仲可以同佢哋溝通到咩?



作者簡介:

黃秋生,字秋生、號秋生哥、影帝、黃哥、黃老師⋯⋯等等。香江灣仔人也,生時,毫無異象,亦無大蛇入屋,只見呱呱墜地,肥肥白白。時值仲秋,因而為名。幼時,頑劣不堪,教而不善,精力過人,常上山下海,破壞王也。未冠,變本加厲,不學無術,言不及義,好行小慧,目中無人。秋少負氣節,立志遠大,唯願終生無所事事,游手好閒,不勞而獲,好食懶飛。及後,竟因緣際會,負芨演藝學院。風起雲湧數十年。到如今,千帆過盡,一事無成,落花流水春去也。唯一生愛看書,雖不求甚解,無立德立言,然亦未作低三下四,奴顏婢膝之事。足以慰平生,曰:人也!

9月2日起升級條件將更新 繼續每月撐壹仔 講真心話撐住我香港!