• 【非攻】你係咪中國人?(黃秋生)
  • 2019-08-28    

 

我唔明,點解而家經常都有人問啲愚蠢嘅問題,仲要逼人回答,例如:「你係咪中國人?」

我想問,係又點,唔係又點?係咪如果係中國人就係好人?或者係中國人就有着數?唔係就冇飯食?點解唔問你係咪男人?係咪女人?你老豆係咪馬騮?OK,你可以話,有啲男人睇起上嚟似女人,女人又似男人,但係關你乜事?

若要回答係咪中國人,首先要搞清楚個概念先。中國人嘅定義,大概係指以漢人為主嘅國家中嘅國民,但係中國仲有好多其他民族,咁即係話,有中國國民身分嘅先可以認係中國人,最近見到有非洲人入咗中國籍,佢話你知佢係中國人,你信唔信?所以,查實你問緊人係乜嘢種族嘅人,或是國籍呢?

世界各地都有華人、漢人、唐人。歐美都有咁多不同人種,你試下問個日裔、非裔、印裔美國公民係乜人,佢一定答你美國人,唔會話自己非洲人,而家美國咁排外,啱嘞,非洲人,返非洲啦!

所以好奇怪嗰啲移咗民去美國、加拿大、澳洲嘅華人,因乜需要咁高調咁強調自己係中國人呢?怕人以為你係日本人?星加坡人?或係慌死人唔知原來你偷渡嘅?點解從來冇見過一班印度人出嚟大叫我係印度呢?唔通佢哋覺得身為印度人好可恥?點解又唔周圍話俾人知你老母係女人呢?其實我唔係烏龜呢?因為係人都知阿媽係女人,你睇起上嚟外形上唔係烏龜,除非唔係!先至要強調你其實係人類,咁睇嚟,出嚟認定身分嗰啲,其實唔係好認同自己係中國人。

有啲人,美國有着數就「其實我唔係好識講中文㗎」、「Well ~ 我鬼仔嚟㗎」,日本有着數就「我前世一定係日本人」、台灣有着數就「台灣之子」。而家大陸有着數就「以作為一個中國人為榮」。其實,係以人民幣為榮,佢嘅光榮係用錢換返嚟嘅,毫無國人風骨,亦無作為一個人嘅尊嚴,更無中華民族嘅榮彩。

你係咪中國人?如果中國人就要好似你咁低三下四,流氓無賴,我唔係囉!其實,佢哋真係冇資格稱之為:華人、唐人、中國人。



作者簡介:

黃秋生,字秋生、號秋生哥、影帝、黃哥、黃老師⋯⋯等等。香江灣仔人也,生時,毫無異象,亦無大蛇入屋,只見呱呱墜地,肥肥白白。時值仲秋,因而為名。幼時,頑劣不堪,教而不善,精力過人,常上山下海,破壞王也。未冠,變本加厲,不學無術,言不及義,好行小慧,目中無人。秋少負氣節,立志遠大,唯願終生無所事事,游手好閒,不勞而獲,好食懶飛。及後,竟因緣際會,負芨演藝學院。風起雲湧數十年。到如今,千帆過盡,一事無成,落花流水春去也。唯一生愛看書,雖不求甚解,無立德立言,然亦未作低三下四,奴顏婢膝之事。足以慰平生,曰:人也!

9月2日起升級條件將更新 繼續每月撐壹仔 講真心話撐住我香港!