• 【細龍太曾是170磅肥婆】陳偉琪露腩掃貨 演細龍太入晒骨最愛偷食
  • 2019-03-01    

 

大台處境劇《開心速遞》入面,背夫偷食嘅細龍太,同阿John嘅姦情,真係睇到網民咬牙切齒,紛紛留言希望佢地劇情交待患愛滋病死。

將水性揚花嘅細龍太,演得淋漓盡致,陳偉琪有前有後嘅身材,真係記一功。不過擁有魔鬼身材嘅佢,以前係肥婆一名,有過一段減肥血淚史。

「細龍太」陳偉琪喺卑詩省大學讀政治系嗰陣,體重170磅。報料者話,之前佢條腰,肥到十足米芝蓮一樣,同依家相比,睇得出佢下過唔少keep fit苦功!原本志願做律師嘅佢,喺律師樓實習過一年,之後唔想浪費自己嘅表演慾,就鋪路去選美。不過百七磅,你估選肉婆咩!勢要入娛樂圈嘅佢,於是進行地獄式減肥,一日只食一餐蔬菜,加埋運動。花咗半年,由170磅車胎身形鍊成鋼條身材,即刻報名選華姐。

結果11年俾佢贏咗亞軍,仲攞埋最上鏡,同最優雅模特兒獎嘅三料華姐。兩年後再戰港姐,依然keep住應大嘅大,應細有細,恃靚行「胸」嘅身材。亦因為咁,佢出道演親嘅角色,唔係色誘陳豪,就係迷惑黃宗澤嘅風騷女人,直到姣婆細龍太。

近年佢有個健身教練男友Billy,陳偉琪繼續狂操,不過本身肥底嘅佢,稍一鬆懈,啲肉就會蒲下頭。呢日佢喺超市一個華麗轉身,腩肉即刻跌出嚟。不過向來不苟小節嘅佢,一啲都唔mind,仲好有自信,照著露腰衫。冇所謂啦,最緊要過到自己,男友又受就得。

期間男友排緊隊買嘢,未到收銀處,陳偉琪已經忍唔住口,急到折開保鮮紙偷肉食。睇嚟呢位細龍太,戲裡戲外都係都好鍾意偷食喎!

立即下載《壹週刊》Apps,隨時隨地睇盡時政專題、深度偵查、娛樂熱話!按此連結 http://bit.ly/next28app

相關新聞:【Mirror靚仔成員 Frankie係佢阿哥】細龍太陳偉琪現實係高人 教香香彈豎琴

https://bit.ly/2ISUv6b