• 【不捨博士Mandy離開《愛․回家》】半個鐘做到有笑有淚 值得俾like添食
  • 2019-01-17    

 

《愛․回家之開心速遞》叫好叫座:嚟緊2月就播足兩年;啱啱元旦嗰集又突破30點收視;演員林淑敏更憑大小姐一角大熱奪得《2018萬千星輝頒獎禮》「最佳女配角」。所以,呢套處境劇嘅受歡迎程度真係不容忽視,連帶劇中其他角色甚至couple都爆紅,例如博士(馬貫東飾)同Mandy(謝芷倫飾)。

可惜,呢對熒幕情侶唔會再喺《愛․回家》出現喇,事關佢哋都宣佈要離開劇組告別《愛․回家》,昨晚(1月17日)劇情更交代咗博士同Mandy嘅離開。劇中,Mandy因幫大小姐頂罪而喺「橙不忍島」坐監3個月,數數手指即將放監,於是昨晚劇情就話Mandy放監後,為理想去英國讀法律(所以謝芷倫先喺IG post出律師打扮嘅相,並留言:「我會盡快學成歸來!我衷心多謝你們每一位的支持。」)而博士亦決定赴英陪讀。

據知,馬貫東同謝芷倫都要拍攝新劇《致所有愛過的人》,可能因此未能抽空繼續《愛․回家》。不過,既然二人喺新劇再度合作,希望佢哋可以再續情緣啦。

順帶一提,處境劇嚟講《愛․回家》又真係幾高質,好似昨晚一集咁,金城安(周嘉洛飾)跟博士去同班潮州佬飲酒傾生意,好笑;熊樹根(劉丹飾)同博士淚說十幾年情同父子嘅主僕關係,感人。短短半個鐘已經做到有笑有淚,值得俾like再添食。

立即下載《壹週刊》Apps,隨時隨地睇盡時政專題、深度偵查、娛樂熱話!按此連結: http://bit.ly/next28app