• 【呢頭跳女團舞轉頭做師奶】直擊黃智雯買餸做煮飯婆 全程唔使董事男友錢
  • 2019-01-22    

 

37歲嘅黃智雯喺新節目《一個因去跳舞》,單拖去韓國學跳舞,仲去當地唔同嘅娛樂公司面試,想入去做練習生。無綫度身訂造真人騷俾Mandy玩,飛去韓國拍足幾星期,你都咪話唔揼本!喺韓國拍完嘢後,Mandy最近為《降魔的2.0》開工,趁住得閒啲啲,即刻約任職珠寶集團副董事嘅男友詹文天Anthony飲咖啡,拍吓拖。雖然佢哋冇親密動作,但係,兩個人有講不完嘅話題,雞啄唔斷咁,乜好耐冇見咩?男友Anthony拎部電話出嚟俾女友睇,兩個唔知睇咩,不過就笑得好開心。隔離枱有個好得意嘅外籍BB,佢兩個眼尾都冇望過,視旁人如無物,仲唔係拍拖嘅最高境界?

歎完咖啡,齊齊行吓,一樣係邊行邊講嘢,經過賣廚具嘅店舖,Mandy揀焗嘢嘅器皿,一邊揀,一邊問男友Anthony意見,似一對夫妻多過似拖友。經過麵包店見到新鮮出爐嘅麵包,Mandy忍唔住排隊買,Anthony喺佢身邊陪佢等。買完麵包,仲未走,見啲菜咁靚,Mandy即刻師奶上身咁,買定斤菜今晚同Anthony返屋企玩煮飯仔。雖然Mandy有個有米男友,但佢全程都冇使佢嘅錢,反而多數係Mandy拎銀包出嚟俾錢,咁嘅女友,真係娶得過呀!

攝錄:陳亦龍

立即下載《壹週刊》Apps,隨時隨地睇盡時政專題、深度偵查、娛樂熱話!按此連結 http://bit.ly/next28app

相關文章:

【需要一個控制到自己嘅男人】拍拖6年認定詹文天為結婚對象 黃智雯:媽咪好鍾意佢

http://bit.ly/2Ml1W3N