• 【重溫|誰是富界一代梟雄】 大劉125億元售商廈 恒大孭債年供12.5億好吃力
  • 2020-09-25    

 

網傳負債逾8,000億恒大集團(3333),向廣東省人民政府發出「關於懇請支持重大資產重組項目的情況報告」,提到倘重組未如期完成,或引發一系列系統性風險,請求省政府協調推進重組計劃。主席許家印昨晚在聯交所發佈聲明,稱相關文件憑空捏造、純屬誹謗,對公司造成嚴重商譽損害,已向公安機關報案。

不過空穴來風,定必有因。事實上內房股兩年前已四出撲水,又發債又回購;中環班金融八卦佬焦點始終落喺恒大地產(3333)身上;打賭到底 「一代梟雄」大劉還是「紅色大鱷」許家印先至係高手呢?

2015年,當樓市愈升愈有之際,一幢幢嘅港島區商廈成為紅色資本家嘅搶手貨;爭相買入用來掛招牌插旗。其中華置(127)最狠,將旗下灣仔美國萬通大廈全幢以125億元出售予恒大,創當時商廈成交價紀錄。大廈已改名為「中國恒大中心」。不過呢單交易喺以分期付款形式支付,華置收咗四成訂金即係50億元後,恒大再攤分六年俾錢;每年俾12.5億元,恒大孭住過萬億債都好吃力,近排都頻頻伸手發債抽水,並以高達11%高息吸客;所以地產佬及金融老都擔定櫈仔睇戲,會否有朝一日恒大無力俾埋尾數完成呢單交易,咁成幢物業就「完璧歸趙」!

其實大劉喺有前科,1985年2月股市風高浪急 ,大劉把手頭嘅愛美高股份以每股2.04元拋售予一班基金佬,連主席都唔做,由大劉嘅風扇廠舊拍檔梁英偉頂上,半年之後,愛美高股價從高位跌到四腳朝天,大劉遂出手以每股0.7元大力吸納愛美高股份,攞番34%控股權,此乃大劉本色也!正所謂前車可鑑,恒大中心會否完璧歸趙落番大劉手上,且看恒大呢一個浪能否過骨!

----------------------------

【英國香港城置業】250萬去倫敦尋寶定曼徹斯特? | 網上直播講座 | https://hk.nextmgz.com/article/2_757752_0 ">立即了解更多

----------------------------

守住新聞自由 和你撐計劃每月$300起撐《壹》仔

按此了解更多

----------------------------

壹呼百應 號召有心人 請香港人睇壹週刊

按此了解更多