• 【獨家斷正●姐姐嫩男車中纏綿】34歲Stephy香車接送王子 拍完拖返香閨長夜浪漫(足本版)
  • 2018-09-01    

 

Stephy(鄧麗欣)同小方(方力申)拍拖10年間相當謹慎小心,絕少被媒體影到拍拖,更莫講話斷正二人出入香閨。不過,Stephy同王子發展姊弟戀後成個人唔同晒,對感情事睇得好開,唔單只喺7月中大方承認戀情,更被《壹》仔輕易捕獲拍拖,仲見證住王子出入女方香閨添。



8月28日下晝大約6點半鐘,《壹》仔目擊Stephy香車配美男,由大埔寓所直駛至一個海港只有一個嘅海港城。戴住口罩嘅兩人一落車就各拎一個紅色環保袋,然後直入誠品,擺明有明確目標需要買,唔係單純拍拖。梗係啦,匿埋喺屋企卿卿我我、乾柴烈火,總好過走出街遮遮掩掩有所顧忌嘅。

為咗盡快完成任務返歸過二人世界,Stephy同王子前後腳趕路,甚少平排交談。但,一旦停低落嚟,二人就禁不住要調情一番。其實只係一個眼神再加啲細微動作,兩人就笑逐顏開,足見佢哋幾有默契、感情有幾熾熱,更突顯王子絕對冧得掂Stephy,話晒喺冧姐姐方面王子絕對有經驗。

2012至2014年間,王子同大自己5歲嘅楊丞琳拍拖。除咗曾經蜜遊夏威夷,又經常被台媒影到男方進出楊丞琳閨房。雖然王子喺楊丞琳閨房中樂而忘返,但最後都因女方工作繁忙聚少離多分手收場。

唔想重蹈覆轍,王子同Stephy就算分隔異地,但不時會飛嚟香港貼身傍實女友,更將冧掂楊丞琳嘅招數套用喺Stephy身上,真係橋唔怕舊最緊要條女受,成功進駐女方香閨繼續「府」中作樂。而以往小心謹慎嘅Stephy,自從同王子一齊後就連番被影到拍拖。除咗因為王子冧得佢掂,亦都可能同自己已經34歲有關,再唔好好捉緊青春尾巴享受沐浴愛河嘅滋味,到時就真係蘇州過後冇艇搭喇。加上今年憑《空手道》先後奪得幾個「最佳女主角」,事業已達高峰唔使再驚「玩物喪志」影響工作啦。

難怪,Stephy同王子行完誠品,一上返車關埋門就立即糖黐豆頭貼頭,黐纏咗好一陣先肯開車返大埔香閨繼續纏綿!



BTW,畫面睇落真係似兩姊弟,仲有少少女尊男卑feel,大家有無同感?



立即下載《壹週刊》Apps,隨時隨地睇盡時政專題、深度偵查、娛樂熱話!

按此連結 http://bit.ly/next28app

+6