• 【不老鮮肉】炎亞綸暫別樂壇 喪簽十四個鐘餵飽Fans
  • 2018-04-10    

 

前飛輪海成員炎亞綸(Aaron)出道13年好似食咗防腐劑咁唔識老,演而優則唱紅遍兩岸港台都有好多粉絲係人都知,單飛後已經先後推出過4張唱片都大賣,一向敢言嘅亞綸更因鬧爆台灣某電視台劇本水平低,而惹來一大堆爭議,但人氣仍然不跌反升。

相隔四年再推出新專輯,雖然只有三支單曲但依然引到一班死忠粉絲大手訂購,反應咁好拿拿淋搞返個簽名會益下班粉絲,咁耐冇出碟,各地粉絲當然把握機會見偶像啦,簽名會當日近千粉絲逼爆會場,當中有來往香港、內地甚至澳洲粉絲都搭飛機前來應援,亞綸當然好識做大唱冧歌之餘仲同粉絲大玩遊戲扮上床意識大膽又甜蜜!話明簽名會,表演完都唔敢怠慢,即刻擺陣一一同粉絲簽名傾下計咁,向來錫Fans 嘅亞綸快活不知時日過,竟然一簽就簽咗十四個鐘到凌晨四點先走得,呢位不老鮮肉嘅魅力認真驚人!

炎亞綸正積極參與內地電視劇,出完呢張EP就全面進軍內地,相信好快又會係內地戲視圈打出一遍天!唱片方面已經收好哂歌製作中,相信下一隻專輯粉絲都唔洗等4年咁耐啦!