• 【天才無需靠阿爸】轉玩指揮僅四年 27歲港男德國奪指揮界國際大獎

  • 發布日期:2017-06-30 06:09

 

在真正的音樂領域上,有一個獎項,更值得香港人自豪。二十七歲的吳懷世於今年二月,贏得有指揮界「諾貝爾獎」之稱的德國蘇提爵士國際指揮大賽,是首次有港人獲獎。

吳懷世透露,中學轉讀男拔,認識了有音樂神童之稱的鋼琴家黃家正(KJ),兩人走堂的時間就花在音樂裡,「彈吓琴,聽吓音樂,研究吓。可以聽一首symphony(交響樂)一個鐘,咁就過咗兩堂。」男拔音樂氣氛濃厚,又有志同道合的好友,但吳懷世仍渴望離開,「我喺香港其實好唔開心,覺得自己好似異類,覺得同社會好脫節,家長都好大壓力。」

後來得到資助,吳懷世在男拔一年後,便到巴黎國家音樂學院鑽研長笛,但卻與指導老師的價值觀出現分歧,「我唔係好鍾意佢個人。其他唔係入室(弟子)專登嚟拜訪佢,又俾錢佢,一堂一個鐘,佢俾得人四十五分鐘,甚至三十分鐘,有時佢唔係好有心機教,連笛都唔攞出嚟。」不過,能終日與音樂共處,他認為生活始終比香港愉快,「喺巴黎再辛苦都好,都冇喺香港咁透唔到氣。」

腦內不只長笛聲

吳懷世講話時,手部動作很多,聽到音樂時,手會不自覺地擺動,彷彿時時刻刻都在指揮。最先將他的小動作與指揮扯上關係,是好友黃家正,「佢見到我聽音樂嗰陣,唔知點解成日隻手喺度郁。佢好encourage(鼓勵)我做指揮,我好細個佢已經同我講,Wilson you are conductor.」

後來他在巴黎發現自己不甘只用長笛演繹音樂,「我喺份譜上面見到漸大聲,我腦裡面其實已經聽到成個樂團由strings(弦樂),之後銅管樂器,再有敲擊樂器,咁樣一個crescendo(漸強),但長笛做唔到。」吳懷世轉至瑞士洛桑高等音樂學院繼續學習,當時的長笛老師再次肯定他的天賦,鼓勵他轉做指揮。畢業回港,吳懷世用三個月時間結識香港管弦樂團的樂師及副團長等人,才得以參與樂團排練,從旁觀摩,這是他真正學習做指揮家的時間。

自學指揮數年,他膽粗粗報名參加國際指揮大賽,只因報名程序簡單,而且費用全免,「我報完名都唔記得咗,係因為我真係諗住唔使錢,send個video去,send個CV去。我冇諗過會被invite,因為有三百人指揮invite二十二個,I was so happy already.」對手陣容強大,當中包括多名知名樂團的指揮,吳懷世一開始便覺得自己毫無立足之處。或許平常心使然,又或許他注定成為指揮家,最終他在比賽中贏得亞軍,冠軍是有十年指揮經驗、曾指揮多個俄羅斯樂團的Valentin Uryupin,季軍則是曾贏取多個指揮獎項的Farkhad Khudyev。

撰文:戴晴曦

攝錄:林金展