• 陳文媛都去》魚蛋價賣鮑魚 ClubOne CEO自揭天價投年宵之謎
  • 2016-12-03    

 

早前過氣影星陳文媛被揭結婚,係土瓜灣平民酒樓ClubOne攞22圍,每圍一萬蚊都唔使!呢間平民酒樓近年紅遍新人界,而家有十五個婚禮場地。就連維園明年農曆年宵市場的最大熟食檔,都係由ClubOne連續四年投得 ,最終達82萬「天價」。記者問過ClubONE行政總裁黃復華,佢坦言:「預咗蝕都繼續叫價」!

黃復華指,今年競投價「無諗過咁高」,但依然去馬,原因好簡單──只要攤位夠大可掛其他公司招牌,賺廣告費已幾乎夠冚數!「就算是第二第三大熟食檔,好多都會搵汽水,或者另外一啲公司做廣告,如果肯搵佢哋,已經可以攞返個租金。」而且,「原來年宵攤檔幾受人注意,有宣傳價值,我哋當時都有心理準備,但真係估唔到嗰價去到咁盡!」而該攤位投來的真正目的,就是用便宜價錢,推銷旗下的出品,黃復華笑言:「市民用一個吃魚蛋的價錢,可以吃到鮑魚或者雞煲翅 ,等他們體驗公司的強項。」

有消息指ClubOne未投得攤位前,已發定新聞稿,在競投環節,黃復華還會與模特兒打扮成新郎新娘,搏傳媒影相:「模特兒係公司員工,佢哋上年見着踢死兔有啲反應。你叫我揀,今年着嗰套馬掛,我都係一半半咋。」如此深諳宣傳之道,簡直是魚蛋價錢,食出滿漢全席的味道!

採訪:梁延宇
攝錄:廖健昌