• 效法一田撐員工》酒樓都放銀行假 ClubOne:租貴只係藉口
  • 2016-12-03    

 

近日有調查發現,近六成七飲食業僱員,每星期需工作超過60小時,有一成員工每星期工時更長達70小時或以上。標準工時久久未能立法,現任飲食界立法會議員張宇人擔心訂立標準工時,會令食肆百上加斤,有指廚師沒有「落場」時間無尊嚴,他卻大放厥詞:「咁使唔使出30萬人工(俾佢)?」

ClubOne集團行政總裁黃復華話佢地反傳統,兩年半前已檢討員工工時,最後決定將每周工作日由六天縮至五天半,每天工作九小時,即每週工作約50小時(不計用膳時間),並且實行銀行假:「我哋寧願只做兩個市,例如早市,特價下午茶我哋一定不會做。其實我哋都有掙扎,人人都咁做,我哋唔係,會唔會好奇怪。」

他續指:「如果我哋學街外酒樓,由早做到晚,同事真係好辛苦,因為佢哋唔係機器,唔使吓吓用得咁盡!我都同同事傾過,有啲場地,夜市唔係特別好嘅話,我哋都寧願做返正價。」他以早茶為例,如小規模酒樓刻意以低價招徠,除了令被逼加班的員工不滿,更可能有反後果,「你成本冇人哋咁平,平咗正價時段人就會少咗,之後唯有越做越平,最後只會鬥唔過大財團。」

不少酒樓東主抱怨香港租金昂貴,若放棄優惠時段會「租都蝕埋」,黃直指酒樓成本根本沒有想像中那麼高:「其實我哋酒樓食肆地方大,租金佔成本只係一成,反而員工支出佔三成。佢哋唔可以講,因為租金貴,就由朝開到晚。」他坦承不少紅日是酒樓生意最好時段,銀行假時員工難免要上班,但會以補假替代,若人手不足,就會聘請兼職。

他總結短工時政策實行後「一啲壞處都無」,明年打算逆市擴充:「做咗咁多年,不但業績無下跌, 反而同事流失率低咗,尤其係廚房,變相慳咗唔少培訓時間。」他還指現時政策不算完美:「如果有一日,我哋餐飲部同事都可以五天工作,我諗我會有好大成就感。」

採訪:梁延宇
攝錄:廖健昌