• 【動畫】活在煉獄之中》康橋之家實錄
  • 2016-10-26    

 

四年前迫不得已將姨甥孫送入康橋之家的林珍,直言那裡是人間地獄。

「入面真係好似人間地獄,佢哋只係牟利,無為過院友著想。好彩我帶佢走,諗起無父無母走唔到嗰啲,被迫住咁嘅地方,真係好淒涼。」林珍眼泛淚光說。

「首先參觀3樓男院舍,入到去真係嚇死我,周圍又黑又暗,成間屋又一陣屎尿味,廁所仲恐佈,污漕到好似好耐無洗嘅公廁。」這是林珍第一次到訪院舍的感覺。

「幾日無去,肥仔(姨甥孫)成身好污糟,咀唇乾到好耐無飲水,牙膏又無用過,連條沖涼巾都乾到鋼絲刷咁硬,細問之下,原來根本無人提佢飲水、刷牙甚至沖涼,佢起碼3日無沖涼無刷牙。」林珍不滿院舍疏忽照顧,其後發現姨甥孫全身長滿紅點。揭開床鋪,駭然發現床單出現大量蟲蚤,床下底更掃出大量曱甴屍骸,十分嘔心。

「一間院舍污漕成咁,你話幾得人驚!」更令她痛心的是,院友們用膳的情景。「好多時我會晚飯時間去,但次次一開飯,個個好似餓鬼咁,食得好急,好似搶咁,最初唔知咩事,後來先知原來有人嚇佢哋,話如果食得慢,之後就無得食或者添食。」

她又直言,對當時的院長張健華沒有好感。「佢份人好輕挑,對啲女院友古古怪怪,我唔止一次聽到啲女院友講,院長只要讚佢乖,就會單獨帶佢出街食飯。」不過她發夢乜沒有想過,這位前院長如今竟然涉及性侵案,更成為不少人口中的淫魔。