• 唔係餸》四圍飛玩音樂節 雞蛋蒸肉餅玩算術民謠
  • 2016-09-01    

 

鹹蛋蒸肉餅就食過,雞蛋蒸肉餅?好唔好食架?唔係啩,band名?仲要係女仔band?「Hello,我係鼓手Hei Hei,我係主音Soft呀,我係bass手YY,我係結他手Soni,我哋係GDJYB(雞蛋蒸肉餅)!」

12年,Hei Hei同Soft成立雞蛋蒸肉餅出席草民音樂節,之後識埋Soni,3個女仔玩認真,要做好隊band,得到小塵埃介紹埋YY做bass手。14年推出第一隻EP,喺日本都有得賣,好巴閉。

諗起雞蛋蒸肉餅,就識唱《榴槤乜乜乜》。「應該係樂迷最熟悉我哋嘅一首歌,咁係咪最代表到我哋呢?比較易唱,大家觀眾可以探討吓我哋啲音樂,因為我哋嘅曲風有少少得意,玩算術民謠Math-Folk,所以音樂元素變化會比較多。」

雞蛋蒸肉餅呢兩年嚟四圍去參加唔同嘅音樂節,好似新加坡、台灣、內地等。GDJYB話:「嚟緊去韓國、澳洲參加音樂節。將我哋香港嘅音樂帶俾世界各地唔同觀眾聽眾,係我哋嘅目標。」

夾band搵唔到錢,分分鍾仲要捱苦打幾份工倒貼嚟玩音樂,雞蛋蒸肉餅各成員又點維持生計?Hei Hei話:「我同主音辭咗份工,以前做廣告嘅,咁而家叫做全職夾band,做啲freelance去support件事,我屋企就好支持嘅。」

Soft話:「我屋企就支持嘅,不過反對唔到,因為我任性。」YY話:「冇乜意見喎我屋企人,有錢塞住佢哋把口就得,交家用。」Soni話:「我都係做freelance,屋企人一直都好支持,冇乜壓力。」

佢哋已經著手籌備下一張唱片,大家等吓喇!「年尾係會出碟,會有發佈會啦,大家記住留定啲日子,係12月份呀!」