• 拒洗米華福利 洗米仔:創業唔係work俾佢睇!
  • 2016-08-19    

 

老豆係澳門賭業猛人周焯華,剛滿20歲的「洗米仔」周柏豪,抗父命唔讀大學,更堅拒父蔭,自行創業搞網絡WOW。一意孤行,因為,「相信自己,我創業唔係為work俾佢(洗米華)睇。」周柏豪說。

開業半年,公司寫字樓二千呎,幾個九十後員工;十九歲做老闆,冇架子的洗米仔周柏豪與員工齊齊坐在bar枱,食lunch吹水。 訪問期間,有員工插嘴窒老細,他亦當住同事面前,承認缺點。「我係心急,不過我嘅優點係經常望住塊鏡同自己講:『你呢個位做得幾差!』」老豆洗米華的大佬氣場濃郁,洗米仔親民得多。 作為周焯華長子,理所當然是太陽城接班人之選,不過思想比較早熟的洗米仔,卻有自己一套,對老豆盤生意,毫不着緊。 「如果佢(洗米華)問我想唔想做?而我係可以好佢一百倍,唔搞冧佢檔嘢,咁我會接受。佢冇問過我,佢唔需要我喺度,我坐喺度做乜鬼!」周柏豪說。

「(如果你老豆想投資落你盤生意呢?)老實講,佢唔係最好嘅拍檔夥伴,因為佢對呢個工業唔熟。我創業唔係為work俾佢睇,我做嘢唔諗佢,做WOW成個理念係想啲人相信自己,想大家可以發揮自己才能達至夢想。俾家人見到好有熱誠去做一件事,呢個先係最重要;就算屋企人唔支持,亦可以用熱誠,去爭取到底。」無論想法和做法,周柏豪都按此付諸實行。