• 四角畸戀 陳庭欣騎住翟威廉搶人男友
  • 2016-03-02    

 

「金帶子」喺《公公出宮》就想生仔,現實中嘅港姐陳庭欣,最想就係搵到好夫君。半同居嘅翟威廉仲唔夠好?係呀,點夠有米大狀咁好呀!

28歲,就快唔再卜卜脆,陳庭欣更要把握機會釣金龜,月前,《壹》仔就發現戴Cap帽扮低調嘅陳庭欣,同大狀新歡Warren(唐偉倫)夜會睇戲,睇完戲,二人再雙雙由數碼港返回男方碧瑤灣屋企,共度春宵。一直都騎住翟威廉搵碼頭嘅庭欣,為免「兵變」,一上到Warren屋企,馬上喺ig貼張準備瞓嘅相,講晒「Good Night」咁,相當高章。

去到上星期一(2月22日),陳庭欣再次喺數碼港偷食,同Warren一齊睇《班加西無名英雄》。雖然完場嗰陣前後腳走,扮晒唔識咁,但紙包唔住火,陳庭欣喺Warren招呼底下,再次上門宿一宵。

本來三角戀已經招人話柄,原來大狀仲要有個索模正印,陳庭欣為mark實荀盤,不惜做小三搞四角戀,比「金帶子」更識得攻心計。