• 周浩鼎回帶 新世界法律顧問懶理東涌人
  • 2016-02-24    

 

鼎,你係咪掛住搭白金扶手電梯,忘記咗東涌嘅居民呀?

立法會新界東補選候選人周浩鼎,因為維基資料被改,嬲嬲豬去差館報警,咁又係嘅,作為政治人物,一個人嘅過去係好重要。

前年,壹仔喺14年8月曾經查探過呢位民建聯新星,報稱自己係律師,但係當時翻查律師會名冊,佢就屬於非持有執業證書嘅律師,即係只能夠提供一般法律意見,而當時佢係離島區嘅委任區議員。

嗰陣已經發現佢係幫新世界打工,辦公室喺新世界大廈,1期19樓法律部,職位係法律顧問。周浩鼎喺2011年3月幫新世界打工,年底就委任入離島區議員,一入局佢便填報喺新世界發展嘅法律顧問,當時填完就冇對外公佈。而大嶼山呢舊肥豬肉一早被新世界睇中咗,咁離島區區議員嘅周浩鼎咪可以第一時間知道大嶼山發展嘅風吹草動,甚至接觸官方機密資料都得。

再翻查周浩鼎做區議會之後嘅所有會議紀錄,所有新世界相關項目,佢都冇做利益申報,當時新世界嘅回應周浩鼎唔會處理地產或者大嶼山業務。

事件揭開之後,雖然佢有道歉,亦都喺律師會名冊到更新番工作地址,不過點解當日唔一早申報呢?不過即使揭發咗,呢位新星上位能力都好快,舊年當選埋民建聯副主席,借委任離島區議員個勢,當選離島區議會東涌南選區議員。不過上任冇幾個月,就跨區嚟到新界東補選想入立法會,咁東涌居民佢仲邊有時間理會呢?

 

新界東補選其他參選人包括方國珊、黃成智、梁思豪,及劉志成、楊岳橋、梁天琦。