• 上水新都M記結業 街坊不捨 憂變藥房

  • 發布日期:2016-02-15 22:38
    最後更新日期
    :2016-02-16 00:18
  • 上水新都M記結業 街坊不捨 憂變藥房

 

香港寸金尺土,誠如大型連鎖快餐店麥當勞都面對商場貴租嘅考驗。繼沙田新城市分店分,早前有消息指會結業嘅上水新都廣場M記,今日(2月15日)亦會於晚上10時正式結業。唔少街坊對區內進駐20幾年嘅地標大表不捨,最多人難忘嘅係喺店內開生日會;據知,此店未無選定新址搬遷,區內此後少咗一間M記,以及大家嘅回憶。

今日新都M記內外有大量氣球裝飾,亦貼出結業告示,多謝顧客喺過去20幾年嘅支持,有唔少新舊街坊都特意去到幫襯最後一餐新都M記,行過都會駐足留影。

有街坊感慨,由以前大舖望住佢變細舖,憶述以前門口有個麥當勞叔叔、有點唱機、遊戲機;有同學搞生日會、讀書、拍拖、友聚,喺大家留言重構一個完整嘅新都M記。

上水藥房、金行林立,已經令居民大嘆區內特色買少見少;有人擔心下手承租嘅又係藥房:「下一手唔會又係開藥房呀!?上水已經夠多啦!」、「M記執笠,新都廣場樓下除了兩間連鎖麵包店,所有食店全軍覆沒,全變服務大陸人水貨客基地。大家樂、許留山、7-11、味千、元綠、cafe 308,諷刺是,以上無一間是小本經營老舖,全是集團連鎖店!」。