• 《十年》正式全線落畫 下月發行海外

  • 發布日期:2016-02-13 20:22
  • 《十年》正式全線落畫 下月發行海外

 

要數最近最多港人捧場嘅港產電影,肯肯定係獨立電影合編《十年》,上映2個月,當中5個故事都被觀眾稱好唔想成真嘅「預言」,成為話題之作。被大陸官媒狠批,外國傳媒加過光環,加上好評如潮,有段時間仲一飛難求。今日(2月13日)終宣佈全線戲院正式落畫。

《十年》由上年12月17日上映,起初只有百老匯電影中心放映,不過已經有唔少人爭住捧場,幾乎場場爆滿;去到至12月底有更多間戲院商放映。截至上月底《十年》嘅票房高達540萬元,係香港獨立電影中少見嘅「高收」,更連續4星期入選香港十大票房榜。

而農曆新年前,得番馬鞍山戲院上映《十年》,而上星期場次仍多達一日6至7場,直至尋日下午放映最後一場後,今日已經無場次;但一直都大收旺場。

《十年》監製伍嘉良回應傳媒時表示,對全線落畫表示可惜,亦表明會繼續「嘗試再傾戲院」,現時更希望做好本地院校巡迴放映,以及座談會。另外又指發行商「Golden Scene」正洽談海外發行事宜,海外觀眾都有機會觀賞,據知海外放映首站將喺下月初舉行嘅「大阪亞洲電影節」。

《十年》由5段短片組成,包括為《浮瓜》、《冬蟬》、《方言》、《自焚者》和《本地蛋》,全片長104分鐘,預視香港10年後的情況,令唔少觀眾心寒兼有共鳴。